Американската Национална воздушно-вселенска администрација – NASA одбележува 3.000 дена откако роверот „Љубопитност“ (Curiosity), слета на Марс, на 6 август 2012 година.
Во чест на настанот, NASA минатата недела објави тнр. панорамска фотографија од Црвената планета, направена од роверот на 18 ноември 2020 година – 2.946-тиот ден. Снимката се состои од 122 посебни кадри од околината на роверот.
„Љубопитност“ во овој миг е на планината Шарп, и бара сознанија околу тоа – зошто Марс се претворил од влажна планета во денешнатта студена пустина. Планината Шарп се издига на 5,5 километри од подножјето на кратерот Гејл, каде што слета роверот во 2012 година.
Деновите на Марс се нешто подолги од оние на Земјата. Еден ден таму е еднаков на еден ден и 40 минути на нашата планета. За околу еден месец, се очекува уште еден ровер на NASA – „Упорност“, да слета на Марс. Тој ќе има поразлични задачи – ќе бара податоци за можен живот во минатото и ќе собира примероци коишто ќе бидат вратени на Земјата заради испитување.