Откако неодамна се појави потврда дека iPhone 12 серијата нуди минимално зголемување на перформансите и капацитетот на RAM меморијатa преку Geekbench и AnTuTu тестовите, сега имаме информации и за капацитетот на батеријата на iPhone 12 Pro Max моделот, благодарение на TENAA листингот.
Најголемиот iPhone досега, според наводите од листингот, има 3687mAh батерија, што е за 282mAh помалку од батеријата на iPhone 11 Pro Max моделот (3969mAh). Исто така, смартфонот е прикажан со 6GB RAM, што претходно сугерираа и Geekbench и AnTuTu листинзите.
Капацитетот на батериите на останатите iPhone 12 модели беше претходно откриен, преку листинг на Vodafone во Холандија. Стандардните iPhone 12 и iPhone 12 Pro имаат 2815mAh батерии, додека 12 mini користи 2227mAh батерија.
И покрај помалите капацитети, Apple тврди дека батериите од iPhone 12 линијата нудат сличен работен век како кај минатогодишните модели. Од друга страна, раните тестови покажуваат дека и покрај новиот и поефикасен 5nm A14 чипсет, батериите на iPhone 12 и 12 Pro моделите не траат толку долго колку и батеријата на минатогодишниот iPhone 11 Pro модел.