Facebook размислува за забрана за политичко рекламирање на својата социјална мрежа пред претседателските избори во САД во ноември. Ова го тврдат луѓето запознаени со можностите во таа компанија, пренесува „Ројтерс“.
Како што е наведено, за усвојувањето на одлуката за забрана на политичко рекламирање сè уште се разговара.
„Забраната за политичко рекламирање би можела да помогне да се запре ширењето лажни вести поврзани со изборите, од една страна, додека постои загриженост дека забраната за политичко рекламирање на ‘Фејсбук’ би наштетила на компанијата и во исто време би ја ограничила можноста на кандидатите да одговорат на раширените вести и новите информации“, пренесува агенцијата.
Ова би било голема промена за Facebook, кој досега се придржуваше до политика на непроверување на фактите презентирани од политичарите или за време на нивната кампања.
Facebook е важна платформа за политичарите, особено во време кога многу луѓе остануваат дома, а класичните кампањи и собири претставуваат потенцијален ризик по здравјето поради пандемијата на Ковид-19.
Еден од поранешните директори на Facebook, Алекс Стамос, процени дека забраната за политичко рекламирање на таа социјална мрежа пред изборите во САД може да биде корисна за досегашниот претседател Доналд Трамп.
„Елиминирањето на политичкото рекламирање на мрежите ќе им користи само на оние кои имаат пари и можност за рекламирање во медиуми“, рече Стамос на својот профил на Твитер.
Политичкото рекламирање е многу мал дел од бизнисот на Facebook. Во претходните 90 дена Трамп и Бајден потрошија вкупно 29,2 милиони долари на рекламирање на социјалните мрежи, додека Facebook во последниот квартал имаше заработка од над 17 милијарди долари.