Пред неколку години, во текот на големиот раст на популарноста на Facebook, Google го виде потенцијалот во социјалните мрежи и одлучи да се натпреварува на ова поле со сопствениот Google+ сервис. За жал, напорите на компанијата никогаш не го достигнаа својот полн потенцијал, а Google+ не успеа да го привлече истото внимание и бројот на корисници како Facebook.
Поради тоа, за многумина не претставуваше изненадување што Google одлучи да ја згасне платформата. Според извештаите, процесот на гаснење веќе почна за некои корисници. Оние кои го посетуваат Google+ пријавуваат дека услугата ги пренасочува на страница која ги известува за гаснењето.
Според зборовите на Бен Смит, официјално лице на компанијата Google, кој ги објави плановите за гаснењето на услугата во октомври минатата година: “Иако нашиот тим инженери вложи доста труд и посветеност во развојот на Google+ сервисот во текот на годините, не е постигната поширока прифатеност од корисниците и програмерите, а услугата имаше лимитирана интеракција со апликациите. Деведесет проценти на Google+ корисничките сесии се пократки од пет секунди”.