Кога имате позната архитектонска и дизајнерска фирма, се очекува и вашата канцеларија да изгледа впечатливо. За тоа биле свесни и архитектите од белгиското студио Klaarchitectuur, кои неодамна го претставиле проектот The Waterdog за обнова на старата капела во нивен работен простор. Резултатот ги воодушевил сите кои имале можност да го видат, а кога ќе ги погледнете фотографиите, ќе ви биде јасно и зошто.
Кога ќе ја погледнете градбата од надвор, само мал дел навестува дека внатре нешто „необично“ се наоѓа. Навистина, кога ќе влезете во просторот, се среќавате со спектакуларен спој на старо и ново.
Додека просториите на канцеларијата, тоалетите и кујната се комплетно преуредени и тие воглавно донесуваат минимализам во бела боја, т.н. заедничките простории се задржани во нивната оригинална форма, со само неколку мали реновирања. Исто така, бидејќи градбата има и одредена историска вредност, некои од нејзините делови се сеуште отворени за јавноста.
