Британскиот регулатор Ofcom го казни 4chan со вкупно 520.000 фунти (602.000 евра) за непочитување на правилата од Законот за безбедност на интернет од 2023 година.
Поголемиот дел од оваа сума произлегува од неуспехот на платформата да обезбеди децата да не се среќаваат со порнографска содржина, што требало да се реши со спроведување на ефикасен механизам за верификација на возраста.
За ова прекршување, страницата беше казнета со 450.000 фунти и ѝ беше наредено да имплементира систем за верификација на возраста до 2 април. Непочитувањето на тоа ќе резултира со дневна казна од 500 фунти сè додека страницата не ги почитува правилата, или најдоцна до 1 јуни.
Ofcom, исто така, откри дека 4chan не спровел доволна проценка на ризикот од нелегална содржина на својата веб-страница, за што е изречена дополнителна казна од 50.000 фунти. Платформата има рок до 2 април да заврши проценка на ризикот, или да се соочи со дополнителни 200 фунти дневно, објави Engadget.
На крајот, регулаторот утврди дека 4chan не вклудил одредби во своите услови за користење што наведуваат како ги штити корисниците од нелегална содржина. Тоа ќе резултира со казна од 20.000 фунти, со дневна казна од 100 фунти од рокот за усогласување на 2 април до 1 јуни.
Регулаторот отвори истрага за 4chan, познат по своите анонимни и немодерирани форуми, во јуни 2025 година за да утврди дали ги почитува своите законски обврски.
Во октомври, Ofcom објави одлуки за некои од своите отворени истраги. Во тоа време, 4chan беше казнет со 20.000 фунти за игнорирање на барањата за обезбедување копија од проценката на ризикот од нелегална штета и информации за неговиот вкупен светски приход.