Во јуни следната година, две земји од Западен Балкан – Црна Гора и Албанија – ќе се приклучат на единствениот пазар на ЕУ кога станува збор за телекомуникациските трошоци.
Оттогаш, во нив треба да започне примената на заедничките правила за „роаминг како дома“ на Европската Унија, односно да им се овозможи на нивните граѓани да остваруваат повици низ цела ЕУ по исти цени како и во нивната матична земја.
Исто така, патувањата на корисниците на телекомуникациски услуги од ЕУ до Црна Гора и Албанија ќе бидат поповолни во однос на повиците и користењето мобилни податоци, бидејќи таму ќе можат да го искористат и бесплатниот роаминг, како што е случај со години во рамките на Европската Унија.
Овој потег е дел од планот за приближување на земјите кандидати Албанија и Црна Гора кон членство во ЕУ и постепено намалување на трошоците за роаминг во регионот, кој е во тек веќе две години, објавува Seebiz.
Овој месец, гореспоменатите земји, заедно со Македонија и Молдавија, се приклучија на европскиот систем за финансиски трансакции SEPA, што значително ќе го забрза и намали трошокот на меѓународните плаќања во рамките на земјите-членки на ЕУ за нивните граѓани.
Покрај горенаведеното, и други земји од Западен Балкан се во процес на преговори за приклучување кон иницијативата за бесплатен роаминг – Македонија, Србија, Босна и Херцеговина, но и Украина, за која оваа пролет беше објавена дека би можела да се приклучи на единствениот пазар за роаминг уште од јануари следната година.