Владејачкото семејство на емиратот на Абу Даби ќе земе 15 проценти удел во американските операции на TikTok преку фондот MGX, врз основа на извршна наредба од американскиот претседател Доналд Трамп.
Фондот MGX, чиј претседател е шеикот Тахнун бин Зајед Ал Нахјан, исто така ќе добие место во одборот на директори на новата компанија што ќе се создаде со одвојување на TikTok во САД, објавува „Гардијан“.
Компанијата Oracle, групацијата за приватен капитал Silver Lake и MGX ќе контролираат околу 45 проценти од TikTok во САД.
Севкупно, се очекува американските компании да контролираат нешто над 65 проценти од новата компанија, а Трамп ги именува компјутерскиот бизнисмен Мајкл Дел и Fox на Руперт Мердок како други инвеститори.
Кинеската ByteDance, сопственик на TikTok, ќе задржи 19,9 проценти удел во американското делување на социјалната мрежа.
Американските операции на алгоритмот, кодот и модерацијата на содржината на апликацијата исто така ќе бидат под контрола на новата компанија. Локалните кориснички податоци ќе бидат складирани во облак управуван од Oracle, објавија медиумите.
Потпретседателот на САД, Џеј Ди Венс, изјави дека новата компанија ќе биде проценета на околу 14 милијарди долари, а Трамп истакна дека договорот е одобрен и од кинескиот претседател Кси Џинпинг.