Според извештаите, Google подготвува десктоп режим сличен на интерфејсот Samsung DeX и Motorola Smart Connect.
Се појавија извештаи дека Google подготвува десктоп режим за својот мобилен оперативен систем. Првите навестувања за овој десктоп режим се појавија уште во 2023 година, но сега се чини дека Google е се поблиску до конечното објавување на функцијата.
Според извештаите, корисничкиот интерфејс моментално има потреба од повеќе усовршување и дотерување, па затоа не се очекува да биде објавен како дел од верзијата за Android 16. Најверојатно ќе го видиме во Android 17, со следната генерација на Pixel телефони.
Функцијата се нарекува „Android Desktop Mode“ и нуди неколку интересни функции, како што се можности за мултитаскинг со прозорци што може да се менуваат големините, традиционални елементи за навигација на работната површина, систем за инсталација на апликации сличен на десктоп оперативните системи, флуидно префрлување помеѓу мобилни и десктоп интерфејси и друго.
Android Desktop Mode треба да работи кога корисникот ќе го поврзе телефонот со надворешен дисплеј преку USB-C портата, но се верува дека ќе биде поддржана и безжична конекција. На пример, Samsung и Motorola нудат безжична поврзаност во нивните десктоп режими.
Се претпоставува дека функцијата ќе биде достапна исклучиво за Google Pixel телефоните, пред да биде овозможена за други Android телефони.