Ако редовно поминувате време на социјалните мрежи или на видео платформите, голема е веројатноста дека сте паднале во стапицата безумно да се движите низ бескрајните кратки видеа додека мозокот не ви се „исклучи“.
За некои, оваа навика може да стане сериозен проблем. Истражувањата покажуваат дека прекумерната употреба на кратки видео апликации може да доведе до проблеми како што се одвлекување на вниманието, лошо управување со времето и намалена способност за учење.
Сепак, YouTube Shorts бележи преку 70 милијарди прегледи дневно, според Google. Платформата агресивно ги турка Shorts, воведувајќи едноставни алатки кои го олеснуваат создавањето содржина, но сега, се чини дека Google почнува да препознава колку може да бидат заразни Shorts и колкав данок може да им донесе на корисниците.
Сајтот Android Authority откри, во 20.15.32 бета верзијата на апликацијата YouTube, дека Google работи на нова функција која има за цел да им помогне на корисниците да управуваат со времето поминато гледајќи YouTube Shorts.
Најновата бета верзија вклучува нови линии на код што детално го прикажува посебен дневен тајмер за лизгање низ Shorts, одвоен од постоечкиот потсетник „Направи пауза“ што се однесува на општото гледање видео. Овој нов тајмер за Shorts се чини дека е дизајниран конкретно да го запре бескрајното лизгање низ Shorts кога ќе се достигне дневното ограничување дефинирано од корисникот.
Во основа, штом новиот тајмер на YouTube Shorts ќе го достигне вашето дневно ограничување, веќе нема да можете постојано да се движите низ Shorts. Сепак, се чини дека YouTube нема целосно да го блокира прегледувањето на Shorts, бидејќи поединечните клипови што се појавуваат на друго место на платформата (како почетната страница или резултатите од пребарувањето) сè уште ќе бидат видливи.
Не е јасно кога оваа функција ќе биде широко достапна, но нејзиното присуство во бета верзијата сугерира дека YouTube активно ја тестира оваа функционалност. Дали навистина ќе им помогне на корисниците да се одморат од искуството на постојано гледање Shorts, останува да видиме.