Најновиот Google Pixel Watch 4 крие изненадување кое ќе ги воодушеви сите љубители на технологијата и „направи сам“ поправките.
Според анализата на познатиот портал iFixit, новиот паметен часовник од понудата на Google доби оценка од 9 од 10 за поправливост, што е реткост меѓу современите гаџети.
За разлика од претходните модели, Pixel Watch 4 повеќе не користи лепак за поврзување на клучните делови. Наместо тоа, има завртки и гумени заптивки, што овозможува полесен пристап до внатрешните компоненти и побрза замена на батеријата или екранот. Батеријата сега доаѓа во метално куќиште и може лесно да се одврти, додека екранот може да се отстрани без оштетување.
Google објави и официјални сервисни прирачници, што дополнително го поедноставува процесот на поправка – без разлика дали е за корисници или независни сервиси.
Овој потег покажува дека Google сериозно пристапува кон темата за одржливост и намалување на електронскиот отпад, бидејќи олеснувањето на поправките го продолжува животниот век на уредот и ја намалува потребата од нови купувања.
Според iFixit, Pixel Watch 4 е еден од најпоправливите паметни часовници на пазарот досега, што би можело да постави нов стандард за другите производители.