Instagram објави дека има нова програма за креатори на содржини на платформата, во обид да ја зајакне својата позиција во однос на конкуренцијата.
Социјалната мрежа Instagram им нуди на одбрани креатори на содржини во САД до 20.000 долари за да ги привлечат луѓето кон апликацијата, во обид да ја зајакне својата позиција во однос на конкурентите TikTok и YouTube.
Ова е пилот-проектот „Препораки“ (Referrals) на Instagram и не е достапен за сите креатори, туку само за оние со седиште во САД со кои компанијата првично контактира.
Програмата функционира така што на креаторите им плаќа 100 долари за секој нов корисник кој се регистрира преку нивниот споделен линк или за секои 1.000 посети на апликацијата преку нивниот линк, со максимална исплата од 20.000 долари, објавува „Бизнис инсајдер“.
Идејата е да се натераат креаторите да го промовираат Instagram на конкурентски платформи како TikTok, YouTube, Discord и Substack.
„Споделете го вашиот Instagram профил, видеа, објави, приказни и канали надвор од Instagram“, им кажува апликацијата на учесниците во проектот.
Најновиот потег на Instagram е дел од серија тестови и програми за стимулација дизајнирани да ги задржат креаторите на платформата, особено затоа што конкурентите како TikTok продолжуваат да привлекуваат таленти со своите понуди.
Шемите за препораки и бонуси брзо стануваат норма во индустријата, а TikTok неодамна лансираше свои награди за препораки кои вклучуваат попусти на купувања и финансиски стимулации за поканување пријатели да се приклучат на апликацијата.