Иако интернетот ни е достапен само неколку децении, се чини дека целото човештво стана зависно од оваа „мрежа над сите мрежи“.

Сега се прашуваме што правевме пред да има Google, социјалните мрежи и сите вести и информации достапни за нас 24/7.

Меѓутоа, кога би требало, веројатно би можеле да поминеме без социјалните мрежи, но се поставува прашањето, што е со сите институции и инфраструктура кои зависат од интернет, како што се електрани, телекоми, банки итн.

Затоа е интересно прашање што би се случило ако исчезне интернетот, односно ако целиот свет ја изгуби врската со мрежата поради некоја причина – токму тоа се обидуваа да го одговорат на страницата на Би-би-си посветена на наука, наречена „Science Focus“.

На крајот на првиот ден откако целата планета беше отсечена од мрежата, само Google и Facebook ќе изгубат повеќе од 300 милиони фунти, а загубите на другите компании, од кои многу ќе престанат да работат, ќе се мерат во милијарди, пренесува Zimo.

Ситуацијата по една недела би била целосно хаотична, а во текстот конкретно се нагласува дека ќе има проблеми со снабдувањето со електрична енергија, што би довело до бројни нови проблеми – со оглед на тоа што електричната мрежа се потпира на интернет за координирање на електраните и трафостаниците, би настанал хаос во енергетскиот систем и локални прекини во дистрибуцијата на електрична енергија за повеќето земји во светот.

Би настанала верижна реакција – без интернет и струја не можат да работат ниту бензинските пумпи, бидејќи освен што не можат да пуштаат гориво, не можат да ја следат и состојбата на резервоарот. Понатаму, без гориво, нема испорака на храна или неопходни работи до супермаркетите, а веројатно би запреле и сообраќајот, индустриите и бизнисите.

По еден месец светот ќе потоне во тотален хаос – вознемирени и гладни луѓе чии животи за кратко време радикално се променија, ќе се борат меѓу себе за веќе разграбена храна. На улиците владеат немири и хаос, а армијата која би била вклучена да помогне има потреба од гориво и залихи кои брзо се трошат.

По една година, повеќето земји од развиениот свет сепак ќе успеат да инсталираат основни телефонски линии, па општеството полека ќе се прилагоди на големите промени и хаосот, а приматот ќе го преземе аграрната економија. Последиците од губењето на интернетот се страшни и на Science Focus велат дека бројот на луѓе кои не го преживеале гладот, студот и немирите би можел да достигне милијарда.

Се разбира, сите овие се претпоставки, но можеме да кажеме дека тие се донекаде втемелени во реалноста.