Новиот терминал на меѓународниот аеродром Џон Ф. Кенеди во Њујорк наскоро делумно ќе се напојува со микромрежа, која воедно ќе биде најголемиот соларен систем на покрив во градот.

Новиот проект се состои од микромрежа која ќе генерира 11,34 мегавати електрична енергија од соларни, горивни ќелии и батерии. Проектот ќе вклучува и систем кој ќе ја задржува топлината од горивните ќелии за загревање или ладење вода.

Иницијативата ќе биде предводена од AlphaStruxure, која е соработка и заедничко вложување помеѓу приватната инвестициска компанија Carlyle Group и француската Schneider Electric. Субјектот ќе го изгради и ќе управува со енергетскиот проект откако ќе го добие договорот од Port Authority of New York and New Jersey, кои се зад аеродромот, како и конзорциумот New Terminal One.

„Решавањето на нашиот енергетски предизвик се сведува на три работи, електрификација, дигитализација и декарбонизација со добивање повеќе електрична енергија од обновливи извори. Микромрежите се клучни за постигнување на сето ова“, рече Анет Клејтон, извршен директор на Schneider Electric North America.

Кога ќе биде завршен, новиот електроенергетски систем ќе се состои од повеќе од 13.000 соларни панели, што ќе го прави најголемиот во Њујорк и на кој било американски аеродромски терминал.

Во однос на производството на енергија, ќе произведе приближно доволно енергија за напојување на 3.570 американски домаќинства за една година. Ќе се состои од многу меѓусебно поврзани „острови“ кои ќе содржат горивни ќелии и батерии за складирање на енергија.

Целиот систем од три „острови“ треба да биде завршен до 2026 година, а последниот ќе профункционира во 2029 година.

Сето ова значи дека New Terminal One ќе може да функционира независно од електричната мрежа на градот за време на итни ситуации кои вклучуваат прекин на електричната енергија.

Во однос на јаглеродниот отпечаток, системот се очекува да произведе 38 отсто помалку емисии на стакленички гасови и да ги намали емисиите на азотни оксиди за 98 отсто. Засега горивните ќелии ќе користат природен гас, но се компатибилни и со почисти горива како што е водородот.

Инаку, новиот терминал е дизајниран да го подобри искуството на патниците и ќе биде еден од најнапредните во светот.