Sixt наведе дека неговата европска флота ќе биде 70-90 проценти електрифицирана до 2030 година.
Компанијата за изнајмување возила Sixt објави дека планира да купи 100.000 електрични автомобили од кинескиот производител BYD до 2028 година. Соработката меѓу двете компании започнува со нарачка на „неколку илјади“ електрични автомобили, а првите испораки во Европа се очекуваат во четвртиот квартал од оваа година.
Ова е првпат компанијата за изнајмување автомобили да понуди возила BYD во Европа, почнувајќи од своите клиенти во Германија, Франција, Холандија и Обединетото Кралство.
Меѓу возилата ќе биде и BYD Atto 3, електричен компактен SUV што се продава под името BYD Yuan Plus EV на домашниот, кинески пазар.
Моделот е базиран на e-Platform 3.0, опремен е со преден електричен мотор кој произведува 204 КС (150 kW), а неговите батерии BYD Blade обезбедуваат 420 километри WLTP автономија, се вели во соопштението.
Sixt изјави дека неговата европска флота ќе биде 70-90 проценти електрифицирана до 2030 година, додека неговите станици и филијали ќе бидат јаглеродни неутрални до крајот на 2023 година. Компанијата исто така развива сопствена инфраструктура за полнење.
Моделите BYD EV ќе му помогнат на Sixt да ги намали емисиите на CO2, по примерот на другите компании за изнајмување автомобили како Hertz, која веќе објави огромни нарачки за електрични возила, вклучувајќи 100.000 возила од Tesla, 65.000 возила од брендот Polestar и 175.000 возила од General Motors .
BYD тврди дека е „најголемиот светски производител на нови енергетски возила“, термин кој ги вклучува BEV (EVs со батерии) и PHEV (plug-in хибриди).
Претходно оваа година, кинескиот производител на автомобили испорача 1.000 возила BYD D1 на мексиканската компанија Vemo, формирајќи ја најголемата флота на EV такси надвор од Кина.