Бројни светски епидемиолози, виролози и специјалисти за заразни болести тврдат дека светот има рок од една година, па дури и помалку, пред вакцините од првата генерација против коронавирусот да станат недоволни ефикасни, пренесува „The Guardian“.
Научниците веќе долго време истакнуваат дека се потребни глобални напори за поорганизирана и побрза вакцинација која на задоволувачки начин ќе ја неутрализира заканата во вид на Ковид-19. Загриженоста се јавува како последица на новите мутации на коронавирусот кои се појавуваат и шират, а некои од нив се позаразни, посмртоносни и поотпорни на веќе постоечките вакцини.
Неповолната прогноза која му дава на светот рок помал од една година ја поддржале дури две третини од испитаниците во истражувањето спроведено од страна на сојузот „People’s Vaccine Alliance“, кое вклучувало 77 научници од 28 земји. Речиси една третина од нив рекле дека временската рамка е најверојатно 9 месеци, а можеби и помалку.
Ниската стапка на вакцинација во многу земји остава отворена можност за појава на мутации отпорни на вакцини, изјавиле 88 отсто од испитаните научници.
„Секојдневно настануваат нови мутации. Понекогаш ја пронаоѓаат нишата која ги прави „поуспешни“ од нивните претходници. Таквите варијанти би можеле поефикасно да се пренесуваат и потенцијално да го избегнуваат имунолошкиот одговор, стекнат од претходните соеви“, истакнал Грег Гонзавлес, вонреден професор по епидемиологија на универзитетот Јејл, пренесува „The Guardian“.
„Доколку не го вакцинираме цел свет, оставаме отворен терен за се повеќе и повеќе мутации кои би можеле да произведат варијанти кои ќе бидат отпорни на моменталните вакцини и ќе им бидат потребни посилни дози“.
Моменталните вакцини кои добија итни одобренија во различни делови од светот се комбинација од стари и нови технологии. Особено е интересен пристапот наречен „mRNA“, каков што користат компаниите Фајзер и Модерна, а кој може за релативно брзо време (во рок од неколку недели или месеци) да се прилагоди на новите соеви, но проблемите во брзината на производство и дистрибуција претставуваат пречка во целата работа.
Но, она што е клучен проблем е дека малку е веројатно дека овие вакцини ќе станат достапни за најсиромашните земји, со оглед дека станува збор за скапи вакцини кои имаат големи барања кога станува збор за складирањето.
Во меѓувреме, богатите земји како Велика Британија и САД веќе вакцинираа со барем една доза повеќе од четвртина од својата популација и обезбедија стотина милиони залихи. Наспроти тоа, државите како Тајланд и Јужна Африка не успеаја да вакцинираат ниту еден отсто од своето население, а некои земји допрва треба да добијат први вакцини.
Повеќето се потпираат на програмата „Ковакс“, глобална коалиција за набавка на вакцини за сиромашните земји, чиј план е во 2021 година да се достават вакцини за најмалку 27 отсто од жителите на земји со ниски приходи.
„Ургентноста популацијата што побрзо да се вакцинира, која ја гледаме во богатите земји, а кои имаат намера сите возрасни да се вакцинираат до лето, едноставно не е одржлива на глобално ниво. Наместо тоа го имаме „Ковакс“ кој цели на можеби 27 отсто до крајот на годината, но дури и ако дојде до тоа – не е доволно добро“, истакнал Макс Лосон, претседател на „People’s Vaccine Alliance“.
„Каде е амбициозната глобална цел, за која науката нѝ вели дека е неопходна? Мислам дека тоа е клучната работа, но ние не гледаме засега дека постои таков план. Ограничената вакцинација е прилично опасна“, додал Лосон.
Извор: Blic.rs