Sony внимателно ги крие тајните поврзани за најновата конзола на Playstation, но тие сè повеќе „случајно“ се откриваат и „протекуваат“ во јавноста.

Меѓу последните шпекулации се и оние дека Playstation 5 ќе биде компатибилен со игрите на „четворката“.

Се говори и за нов патент што овозможува дополнителни функции на џојстикот… Станува збор за технологија со опции за следење за телесните реакции на играчот при играњето – колку тој се поти, колкав е бројот на отчукувања на срцето итн.

– Производителите сакаат да им понудат на гејмерите интерактивно и тродимензионално искуство за поголемо уживање во игрите. Сè поголемиот пристап до екрани што се држат на глава како, на пр., ВР-очилата, ја направи оваа технологија доста барана – се вели во описот на патентот. Овие наводи сѐ уште не се официјално потврдени.

Датумот на објавување на Playstation 5, како и продажната цена, сѐ уште не се познати. Sony ги почитува строгите NDA-стандарди за да ги заштити патентите што се дел од новата конзола. Освен тоа, и Microsoft имаше планови оваа година да ја претстави својата конзола Xbox, па Sony се обидува да ги сокрие своите адути.