Европскиот пазар на паметни телефони забележа раст по 12 последователни квартали во минус. Samsung има најголем удел на пазарот, најмногу благодарение на серијата Galaxy S24.
По 12 последователни квартали на пад, европскиот пазар на паметни телефони конечно забележа раст. Според најновиот извештај на аналитичката компанија Canalys, во периодот од 1 јануари до 31 март во Европа биле испорачани 33,1 милиони паметни телефони, што претставува раст од два отсто во однос на истиот период лани.
Имено, Samsung го обезбеди првото место со пазарен удел од 37 отсто благодарение на големата побарувачка за модели од серијата Galaxy S24. Поконкретно, Canalys наведува дека актуелната предводничка серија на Samsung забележала вкупно 4,3 милиони испораки во Европа, што е зголемување за 58 проценти.
На второ место е Apple со пазарен удел од 22 отсто, а може да се пофали и со двата најпродавани телефони во Европа – iPhone 15 Pro Max, кој продаде 2,6 милиони единици и iPhone 15 Pro, кој продаде 1,6 милиони единици.
На трето место е Xiaomi со 16 отсто удел на пазарот, најмногу благодарение на телефоните од пониска и пониска средна класа, додека на четврто место е Motorola со 6 отсто удел на пазарот. Петтото место го зазема Honor со три отсто пазарен удел и вкупно еден милион испораки во првиот квартал.
Аналитичарите на Canalys предвидуваат дека европскиот пазар на паметни телефони ќе порасне за скромен еден процент во остатокот од годината.