Тактиката на Нетфликс за контрола на споделувањето лозинки на услугата полека почнува да се исплати.
Компанијата објави значително зголемување на бројот на претплатници во месеците откако беа спроведени мерките за спречување на корисниците да споделуваат сметки надвор од нивното домаќинство.
Во извештајот до акционерите, Нетфликс истакна дека напорите да се спречи споделувањето лозинки не предизвикале масовни откажувања, туку охрабриле повеќе луѓе да креираат свои сметки.
Дополнително на ова, Нетфликс посочува дека ќе продолжи со забраните за споделување лозинки и ќе ја прошири акцијата во земјите каде тоа досега не е направено. Тука спаѓаат Хрватска, Индија, Индонезија и Кенија, меѓу другите.
Компанијата посочува дека нема да понуди опција „екстра член“ во овие региони, бидејќи веќе ги намалила цените на претплатата во многу од овие земји. Наместо тоа, компанијата вели дека луѓето ќе можат да користат алатки за да ги префрлат своите профили на нова сметка.