Алгоритмите одредуваат што и по кој редослед гледаат корисниците на социјалните мрежи, а компаниите строго ги чуваат.
Група кинески дигитални гиганти, вклучително и Alibaba, Tencent и ByteDance, сопственикот на TikTok, му дадоа на регулаторот увид во алгоритмите, кои социјалните мрежи обично ги сметаат за деловна тајна, бидејќи тие се клучни за нивниот успех, пренесува Хина.
Алгоритмите одредуваат што и по кој редослед гледаат корисниците на социјалните мрежи, а компаниите строго ги чуваат. Американските технолошки гиганти Мета и Алфабет успеаја да обезбедат статус на деловна тајна, забележува Би-Би-Си.
Кинеската управа за сајбер простор (CAC) објави листа со описи на 30 алгоритми и планира да ја објавува редовно во иднина за да ја спречи злоупотребата на податоците, се вели во заедничкото соопштение на компаниите.
На листата се и алгоритмите од компанијата за дигитална трговија Taobao, во сопственост на Alibaba. Алгоритмот на Таобао „препорачува производи или услуги на корисниците врз основа на нивниот дигитален отпечаток и податоците од пребарувањето“, се вели во документот.
Алгоритмот на ByteDance за Douyin, кинеската верзија на TikTok, наводно ги мери интересите на корисниците врз основа на кликови, коментари и допаѓања.
ByteDance одби да коментира за најавата за алгоритам, а Alibaba и Tencent не одговорија веднаш на барањата на BBC за коментар.
Кина во март усвои нови прописи за алгоритми, според кои корисниците можат да одбијат такво следење на активности, а компаниите мора да регистрираат алгоритми во CAC доколку можат да влијаат на јавното мислење или да го мобилизираат општеството, потсетува Би-Би-Си.