Антиковид пилулата која ја разви компанијата Мерк е ефикасна во лекување на вирусот, оцени Американската агенција за лекови (ФДА) во прелиминарниот извештај објавен денеска.
Но, агенцијата сепак препорачува истата да не ја користат трудници.
Оваа објава на податоци е во пресрет на состанокот на експерти на ФДА, закажан за 30-ти ноември, кога ќе бидат проценети препораките за одобрување на овој лек, наречен молнупиравир, за итна употреба.
Ако биде одобрен, лекот ќе претставува голем напредок во борбата против пандемијата и ќе овозможи многу полесно да се намалат сериозните облици на болеста.
Во својот извештај, ФДА оценува дека молнупиравир е ефикасен кај пациенти заболени од Ковид-19 и кај кои постои ризик од хоспитализација.
Американската агенција за лекови сепак предлага одборот да не препорачува употреба на овој лек за трудници, оценувајќи дека нема никаква клиничка потврда дека добробитот на лекот е поголем од ризикот во тој сегмент на популацијата.
Мерк побара дозвола за употреба на лекот врз основа на клинички проби, спроведени со партнерот „Ridgeback Biotherapeutics“ кај лица со лесни до умерени случаи на Ковид-19 и со најмалку еден отежнувачки фактор на ризик. Лицата го добиле лекот во рок од 5 дена по првите симптоми.
Стапката на хоспитализација или смртност кај испитаниците била 7,3 отсто во однос на 14,1 отсто кај оние кои добиле плацебо. Ниту еден смртен случај не е констатиран кај лицата кои добиле молнупиравир во однос на 8 смртни случаи во другата група.
Резултатите биле доволно убедливи со што независниот одбор за надзор на податоци, во консултација со ФДА, одлучил предвремено да ги прекине клиничките проби.
Извор: B92.net