Jапонската компанија Fujifilm објави дека нејзиниот лек Avigan, веќе одобрен за потешките групи, обезбедил статистички значајно намалување на времето за заздравување на пациентите со Ковид-19.
Од 156 пациенти вклучени во клиничкото испитување од третата фаза во Јапонија, просечното времетраење на заздравување било 11,9 дена за оние кои биле лекувани со Avigan, а 14,7 дена за оние третирани со плацебо, се вели во соопштението на компанијата.
Крајот на закрепнувањето бил одредуван кога коронавирусот веќе не бил детектиран со ПЦР-тестовите, а пациентите немале други симптоми како треска.
Клиничкото тестирање било насочено кон пациенти со лесна пневмонија поврзана со Ковид-19.
Испитувањето спроведено од март, сега е завршено, а не открило никакви нови опасности по здравјето на пациентите поврзани со земањето на Avigan, прецизира Fujifilm .
Компанијата сега ќе спроведе детална анализа на податоците собрани за време на тестирањето и очекува во октомври да поднесе апликација за комерцијално одобрување на лекот за Ковид-19 во Јапонија.
Лекот Avigan (фавипиравир) во Јапонија е дозволен од 2014 година, но само за третман на тешки случаи на грип кога стандардните лекови немаат ефикасност.