Пандемијата на коронавирус го запре 20-годишниот напредок во борбата против сиромаштијата и болестите, според основачот на „Мајкрософт“, Бил Гејтс.
Извештајот на Фондацијата „Бил и Мелинда Гејтс“, покажува дека скоро според секој индикатор, светот заостанува во обидот да ги исполни целите на одржливиот развој на ООН за ставање крај на сиромаштијата и намалување на нееднаквоста.
Екстремната сиромаштија се зголеми за 7 проценти поради пандемијата, се вели во годишниот извештај на фондацијата.
Покриеноста на вакцините – мерка за функционирање на здравствените системи – падна на нивоа што последен пат беа видени во 90-тите години на минатиот век, „носејќи го светот назад за 25 години за само 25 недели“.
Податоците исто така покажуваат дека економските последици од пандемијата ги зголемуваат нееднаквостите, особено кај жените, расните и етничките малцинства. Особено се погодени луѓето што живеат во услови на екстремна сиромаштија.
Гејтс за Би-Би-Си изјави дека очекува ефективната вакцина за Ковид-19 да биде готова до почетокот на следната година. Тој додаде дека секоја вакцина што се произведува мора да биде достапна во сиромашните земји.
Во извештајот што го објавуваат заедно секоја година од 2017 година, Бил и Мелинда повикуваат на глобална соработка во развојот на дијагностика, вакцини, третмани, брз развој и дозирање на вакцини и фер испорака на овие средства врз основа на потреба, а не на можност за плаќање.
„Глобалната криза е честа и бара заеднички одговори“, напишаа тие во извештајот на фондацијата.