Некои делови од светот започнаа да се извлекуваат од пандемијата на коронавирусот и претпазливо започнуваат со враќање во нормала, но вирусот останува голем ризик сè додека не се развие вакцина против него, изјави денеска експертот на Светската здравствена организација, Мајк Рајан.
Тој процени дека некои земји сè уште се во центарот на пандемијата, додека други почнале да покажуваат знаци на намалување на обемот на заразата, пренесува „Ројтерс“.
„Во таа смисла, постои надеж. На глобално ниво, ситуацијата е многу, многу сериозна, но причините за заболувањето и траекторијата на вирусот се многу различни во различни делови на светот. Можно е да се стави болеста под контрола и можно е да се продолжи нашиот нормален економски и социјален живот, но на нов начин и со голема претпазливост“, рече Рајан.
Тој посочи дека во некои земји во Африка и Централна и Јужна Америка, траекторијата на вирусот сè уште расте, и дека иако сега се чини дека тоа не претставува голем проблем, можноста за тестирање останува проблематична.
„Ние сме во средиштето на битката на нашите животи, сите ние низ целиот свет. Ќе биде голем и долг ризик сè додека не добиеме безбедна и достапна за сите вакцина“, рече Рајан.
Ублажувањата на мерките што започнаа да ги спроведуваат некои земји не значи дека вирусот е апсолутно поразен, туку дека дојден е моментот кога вирусот може да се контролира и економскиот и социјалниот живот одново да започнат.
Рајан исто така предупреди дека владите кои сакаат да ги ублажат мерките, мора да го сторат тоа со голема претпазливост.