НАСА ги истражува наводите против астронаутка која наводно пристапувала до банкарската сметка на нејзината сопруга од Меѓународната вселенска станица.
Тоа може да биде прво обвинување за кривично дело сторено во вселената.
Ен Меклејн призна дека пристапувала на сметката на нејзината разведена сопруга, но изјавила дека не сторила ништо лошо, објави New York Times. Нејзината сопруга Сем Ворден, наводно, поднела тужба против Меклејн до Федералната комисија за трговија.
Во меѓувреме, Ен Меклејн се врати на Земјата, а нејзиниот адвокат изјави дека астронаутката само сакала да види дали нејзината поранешна партнерка има доволно пари за да ги плати сметките и да се грижи за синот што заедно го одгледувале пред да се разведат.
„Таа цврсто негира дека сторила нешто несоодветно“, рече адвокатот Русти Хардин, додавајќи дека Меклејн „целосно соработува“ со истражителите.
Меклејн и Ворден, која работи за разузнавањето на воздухопловните сили, се венчаа во 2014 година. Ворден официјално побара развод во 2018 година.
Меклејн дипломирала на престижната воена академија „Вест Поинт“ и потоа работела како воен пилот во Ирак. Таа беше избрана да лета за НАСА во 2013 година.
Пет национални и меѓународни вселенски агенции се вклучени во работата на Меѓународната вселенска станица – од САД, Канада, Јапонија, Русија и меѓународна агенција со експерти од повеќе европски земји. Договорената правна рамка предвидува законите на земјите на потекло да се применуваат за сите лица и имотот во вселената.
Значи, ако еден канадски државјанин би сторил кривично дело во вселената, ќе му се суди во согласност со канадскиот закон, а на руски државјанин во согласност со рускиот.