Хакиран WhatsApp: Шпиони влегле во системот и крадат податоци!

Шпионски софтвер изработен од страна на вешти хакери успеал да погоди голем број мобилни телефони преку популарната комуникациска платформа „Ватсап“ и тоа без интервенција на корисниците, преку гласовните повици во апликацијата.

Весникот „Фајненшл тајмс“ ја идентификува израелската група НСО како можен извршител на нападот, објави агенцијата АП.

Шпионскиот софтвер на НСО е повеќепати откриен при хакирање уреди на новинари, адвокати, заштитници на човековите права и дисиденти.

Софтверот успеал да навлезе во телефоните преку пропуштени повици во рамки на функцијата за гласовно бирање на апликацијата, соопшти портпаролот на „Ватсап“ и рече дека со софтверот, откриен на почетокот на мај, заразени се непознат број уреди.

Се тврди дека корисниците не можеле да направат ништо во своја одбрана, а според зборовите на експертите, единствен начин на заштита во овој случај е апликацијата „Ватсап“ воопшто да не била инсталирана на телефонот на корисникот.

Како значајна ситуација во врска со овој случај се истакнува тоа што софтверот е вплеткан и во убиството на саудискиот новинар Џамал ​​Кашоги, кој беше убиен минатата година во саудискиот конзулат во Истанбул.