Apple одбележа 20 години од all-in-one компјутерот iMac (ВИДЕО)

iMac компјутерот на Apple е претставен во 1998. година, а вчера беше обележана 20. годишнината од уредот. Извршниот директор на компанијата Тим Кук јубилејот на популарниот all-in-one компјутер го одбележа со комеморативна порака на Twitter.

Компјутерот прв пат беше прикажан на 6. мај, 1998 година, а го претстави тогашниот легендарен Извршен директор и соосновач на Apple, Стив Џобс. Оригиналниот модел за тоа време имаше радикален all-in-one дизајн, CRT монитор и CD-ROM драјв, а компонентите беа сместени во проѕирно куќиште со јајцевиден облик. Системот имаше 233MHz PowerPC процесор, 4 GB хард диск и се продаваше по цена од 1300 долари во САД.

Оригиналниот iMac бепе прв производ, кој произлезе од соработката на Џобс и Џони Ајв (главниот дизајнер во компанијата Apple). Успехот на iMac беше клучен катализатор во ренесансата на компанијата Apple, која предводеше Стив Џобс, а во следната деценија пристигнаа iTunes, Apple Store, iPod и iPhone.

Откога беше претставен оригиналниот модел, iMac линијата продолжи да еволуира и напредува, пасега имаме 21-инчен и 27-инчен модел со рамен LCD екран и неспоредливо помоќни перформанси.