Истражувачи од Кинеската академија за наука и Австриската академија на науки го реализираа првиот квантен видеоповик со помош на сателитот Micius, кој беше лансиран во 2016 година. Повикот се оствари на 29 септември меѓу Пекинг и Виена и беше целосно заштитен од хакирање.

Ова не беше обичен повик – беше првата демонстрација на повик целосно реализиран и енкриптиран со квантна технологија и обележа значителен напредок на полето на квантните комуникации и потенцијалното влијание кое може да го има технологијата на начинот на пренос на информации.

Повикот беше енкриптиран со праќање информации поставени во честички светлина односно фотони генерирани од сателитот Micius. Micius беше лансиран минатата година и успешно користеше квнтна криптографија за да испрати податоци назад до Земјата во август годинава.

Како што објаснуваат од Австриската академија на науки, фотоните се испраќаат до станици лоцирани во Кина и Европа, како и до станица во Австрија. Со помош на рилеј станица во орбитата комуникацијата ги надминува ограничувањата на комуникацијата поради заобленоста на Земјата и губењето на сигналите во долгите оптички кабли. Уште побитно е тоа што за разлика од традиционалните методи на комуникација, кои мое да ги хакира секој што има одредено техничко познавање, кватната комуникација не може да се хакира и секој што ќе се обиде да се инфилтрира во системот ќе биде откриен.

„Доколку некој се обиде да ги пресретне фотоните кои се разменуваат меѓу сателитот и Земјата и да ја измери нивната поларизација, ќе се смени кватната состојба на фтоните и веднаш ќе се откријат хакерите“ велат научниците. Квантната комуникација барем засега е единствената која не може да се хакира, но со тек на време веројатно ќе се најде некој што ќе успее да го направи и тоа. Пекинг и Виена нема да бидат единствените градови каде ќе се тестира квантната комуникација. Во иднина се планираат такви видеоповици меѓу Кина и Сингапур, Италија, Германија и Русија.